PAYSAGE À L`INFINI (detalle da parte central)
Óleo sobre lenzo, 50 x 180. Marseille, 1974 (Colec. Ateneo de Madrid).
Como noutras paisaxes inventadas de Yosso, aquí están a composición xeométrica, a profundidade aérea, as perspectivas infinitas e os horizontes inmensos cos que non se atrevían os impresionistas. Pero arriba «o ceo azul, coas súas fermosas nubes, brancas e vagabundas… que movemento!, que maxestade!», diríanos Sisley, o máis puro dos impresionistas. Na supremacía da zona aérea sobre a terreal esta pintura lémbranos a escola holandesa de Van Goyen ou de Hobbema. Pero en Yosso está a modernidade, e a luz e o aire son tamén protagonistas en tan fondas perspectivas, perspectivas infinitas. Pintura ATMOSFÉRICA e pintura DIMENSIONAL, chamou Gerardo Diego á pintura de Yosso.